Segir íslenska skóga nýtanlega auðlind

Mikið magn af hágæðatimbri hefur fallið til við grisjun í Skorradal í sumar. Skógræktarstjóri segist viss um að markaður sé fyrir timbrið og er bjartsýnn á að koma því í auknum mæli í notkun hér á landi.

„Við höfum verið að prófa þetta, ég var að setja upp hús sjálfur þar sem ég notaði svona timbur, og það kom rosalega vel út,“ segir Jón Loftsson skógræktarstjóri. Hann segir hægt að nota timbrið í klæðningu, húsgögn og ýmislegt annað.

Á bilinu fimm til sex þúsund rúmmetrar voru grisjaðir úr skóginum í Skorradal. Elstu trén eru ríflega 50 ára og því stórir stofnar og gott timbur sem fæst úr bestu trjánum, segir Jón.

Stór hluti af því timbri sem til féll við grisjunina var kurlaður og nýttur í ofnum járnblendiverksmiðju Elkem á Grundartanga. Þá er lélegasta timbrið kurlað í spæni og notað fyrir dýr í kjúklinga- og svínabúum og víðar.

Jón segir að Skógræktin hafi haldið besta timbrinu eftir og vonast til þess að hægt verði að selja það í haust. Til greina komi að Skógræktin eignist betri sög til að saga timbrið í planka, enda engin sögunarmylla á Íslandi til að vinna trjábolina.

„Það er ekki spurning að það er markaður fyrir þetta,“ segir Jón. „Það sem gerðist eftir hrunið var að menn áttuðu sig á því að íslenskt timbur er nýtanleg auðlind.“

Hann segir að mikil uppsöfnuð þörf sé fyrir grisjun í skógum landsins og því lítið vandamál að svara eftirspurn. Hulda Gunnarsdóttir, sem býr á Fitjum í Skorradal, segir ekki nóg að gert við að koma íslensku timbri í notkun. Hún hefur látið klæða hús og smíða húsgögn úr timbri úr Skorradal, og segir alla sem að því hafa komið sammála um að um úrvals hráefni sé að ræða.

„Vandamálið er að enginn farvegur er fyrir úrvinnslu,“ segir Hulda. Hún segir Skógræktina þurfa að gera mun meira en hingað til hafi verið gert til að koma timbrinu í umferð. „Það mun falla til timbur, og ef við gerum ekkert með það fer það allt í kurl.“

Hulda segir að til dæmis mætti leyfa fyrirtækjum sem byggja sumarbústaði að prófa að smíða úr íslensku timbri fyrir lítið fé og leyfa minni verkstæðum að kaupa ódýrt til að prófa sig áfram með smíði á húsgögnum eða öðru tilfallandi.

brjann@frettabladid.is