Íslensk samstaða er forsenda viðræðna

Forsenda þess að Bretar og Hollendingar hefji viðræður við Íslendinga um nýja Icesave­-samninga er að full samstaða takist með íslensku stjórnmálaöflunum. Í slíkri samstöðu myndi felast trygging fyrir að nýir samningar myndu halda. Um leið þurfa, að mati Breta og Hollendinga, að liggja fyrir skýr samningsmarkmið af hálfu Íslands.

Íslenskum stjórnmála- og embættismönnum, sem átt hafa í samskiptum við starfsbræður sína í Bretlandi og Hollandi, hefur verið gert þetta ljóst.

Samkvæmt upplýsingum Fréttablaðsins hafa þau samskipti verið stöðug síðustu daga. Upplýsingum er miðlað á báða bóga og þreifað á viðmælendum en engar formlegar yfirlýsingar verið gefnar. Þá hefur Steingrímur J. Sigfússon fjármálaráðherra hitt að máli sendiherra nokkurra Evrópuríkja á Íslandi.

Bretar og Hollendingar eru varfærnir enda forðast þeir íhlutun í íslensk innanríkismál. Þeim er bent á að mikil óvissa kunni að skapast um lyktir Icesave felli íslenska þjóðin lögin þar um í þjóðaratkvæðagreiðslu. Í krafti þess er reynt að fá þá að samningaborðinu að nýju.

Lagt er upp með að nýjar viðræður yrðu frábrugðnar hinum fyrri að því leytinu til að sáttasemjari yrði fenginn til að stýra þeim.

Bretar og Hollendingar hafa sagt að eigi að koma til nýrra viðræðna þurfi Íslendingar að óska eftir þeim með formlegum hætti. Þeir muni ekki biðja um viðræður að fyrra bragði.

Jóhanna Sigurðardóttir forsætisráðherra ræddi á mánudag, auk fjármála- og utanríkisráðherra, við forystumenn stjórnarandstöðunnar. Þar var sammælst um að reyna að koma málinu í sáttafarveg. Eftir fundinn sagði Jóhanna Breta og Hollendinga hafa lýst skilningi á stöðunni hér þótt þeir hafi um leið lýst vonbrigðum með hana.

Auk þess að reyna að finna flöt á nýjum viðræðum við Breta og Hollendinga hafa íslensk yfirvöld átt í samskiptum við Norðurlöndin vegna lánamála. Samningar um lánveitingar fóru í salt í framhaldi af ákvörðun forseta Íslands í síðustu viku.



Eftir því sem næst verður komist hefur ekkert nýtt gerst á þeim vettvangi en áfram er reynt að þoka málum.

bjorn@frettabladid.is

kolbeinn@frettabladid.is