Loftsteinadrífa skellur á jörðinni, ætti að sjást vel á Íslandi

Loftsteinadrífa skellur á jörðinni seint í kvöld en hún stafar frá halastjörnunni Swift-Tuttle

Loftsteinadrífan heitir Perseifur í höfuðið á samnefndu stjörnumerki og hún mun skella á jörðinni um ellefu leytið í kvöld.

Samkvæmt veðurspá er gert ráð fyrir heiðskýru veðri víða um landið og því ætti drífan að sjást vel enda gengur tunglið snemma niður í kvöld. Áætlað er að loftsteinadrífan standi yfir í um þrjá tíma og að henni ljúki um tvö leytið í nótt.

Þegar drífan stendur sem hæst er áætlað að um 100 loftsteinar brenni upp í gufuhvolfinu á hverjum klukkutíma.

Sævar Helgi Bragason stjarnfræðingur segir að engin hætta stafi af þessari loftsteinadrífu enda flestir steinanna í henni mjög litlir eða álíka og rykkorn að stærð. Hinsvegar geti orðið um tilkomumikla sjón að ræða og vonar Sævar Helgi að veðurspáin haldi fyrir kvöldið.

Halastjarnan Swift Tuttle sást fyrst í júlímánuði árið 1862 af stjarnfræðingunum Lewis Swift og Horace Tuttle.