Harry Redknapp: Webb hefur aldrei dæmt vel hjá mér

Harry Redknapp var ekkert alltof ánægður þrátt fyrir 3-1 sigur Tottenham á Blackburn í ensku úrvalsdeildinni í dag. Hann fagnaði þó mikilvægum sigri.

„Fólk er alltaf að efast um allt en ég hef alltaf sagt að við ættum möguleika á að ná fjórða sætinu. Það er langt frá því að vera óhugsandi og við höfum átt gott ár," sagði Harry Redknapp.

„Þetta voru frábær úrslit því ég vissi fyrirfram að þetta yrði mjög erfiður dagur fyrir okkur. Blackburn byrjaði vel en við komum til baka og þetta voru mikilvæg þrjú stig," sagði Harry Redknapp.

Howard Webb verður fulltrúi enskra dómara á HM í Suður-Afríku í sumar en hann fékk ekki hrós frá Harry Redknapp. „Webb hefur aldrei dæmt vel hjá mér," sagði Redknapp og bætti við:

„Ég get nefnt fimm eða sex dæmi þar sem hann hefur dæmt og við höfum verið mjög óheppnir með dóma hans. Við áttum að fá tvö víti og það var greinilega brotið á markverði okkar í marki þeirra," sagði Redknapp.