Gylfi skoraði bæði mörk Reading - Kári líka á skotskónum

Gylfi Þór Sigurðsson skoraði bæði mörk Reading í 2-0 sigri á Bristol City í ensku b-deildinni í dag. Kári Árnason kom Plymouth í 1-0 í 1-1 jafntefli á útivelli á móti Coventry.

Gylfi skoraði bæði mörkin sín í fyrri hálfleik, það fyrra kom með skalla á 12.mínútu og það síðara skoraði hann úr vítaspyrnur á 22. mínútu en Gylfi fiskaði vítið sjálfur.

Gylfi lék allan leikinn eins og Brynjar Björn Gunnarsson og Ívar Ingimarsson.

Kári kom Plymouth í 1-0 með skallamarki á lokamínútu fyrri hálfleiks en Aron Einar Gunnarsson og félagar náðu að tryggja sér stig með jöfnunarmarki Michael McIndoe á 49. mínútu.

Aron Einar Gunnarsson lék bara fyrri hálfleikinn en Kári var í miðri vörn Plymouth allan leikinn.