Margt rangt í skýrslu Bandaríkjamannsins

Margt í minnisblaði staðgengils sendiherra Bandaríkjanna á Íslandi af fundi hans með íslenskum embættismönnum er rangt. Þetta sagði Össur Skarphéðinsson utanríkisráðherra í umræðum um málið á Alþingi í gær.

Bjarni Benediktsson, formaður Sjálfstæðisflokksins, sagði að í minnisblaðinu kæmu fram athyglisverðar og alvarlegar upplýsingar með hliðsjón af hagsmunum Íslands. Það beri með sér að ríkisstjórnin hefði lagt sig fram um að koma í veg fyrir þjóðar­atkvæðagreiðslu um Icesave-lögin, ekki hafi verið efst á baugi að tala fyrir málstað Íslands og að reynt hafi verið að velta Icesave-vandamálinu yfir á Norðmenn. Bjarni sagði alvarlegast að fulltrúar stjórnvalda skyldu á fundinum í bandaríska sendiráðinu tala um þjóðargjaldþrot og greiðslufall Íslands á næsta ári. Sú óþægilega tilfinning læddist að sér að hagsmunir ríkisstjórnarinnar fari ekki saman með hagsmunum þjóðarinnar.

Össur varaði menn við að taka of mikið mark á fundargerðinni, margt í henni væri ekki rétt. Sjálfur kannaðist hann ekki við ýmislegt og annað virtist tekið upp úr fréttum. Sagði hann fráleitt að starfsmenn utanríkisþjónustunnar hefðu lýst yfir greiðslufalli á næsta ári yrði Icesave-lögunum hafnað í þjóðaratkvæðagreiðslu en benti á að ríkisstjórnin hefði sent forsetanum gögn þar sem talað væri um auknar líkur á ætluðu greiðslufalli. Sagði hann að endingu að fundurinn í sendiráðinu hefði verið partur af fundalotu með sendimönnum erlendra ríkja á Íslandi og íslenskra sendimanna erlendis með þarlendum stjórnvöldum.

Sigmundur Davíð Gunnlaugsson, formaður Framsóknarflokksins, átaldi málflutning ríkisstjórnarinnar erlendis og beindi sjónum sérstaklega að efnahags- og viðskiptaráðherranum. Gunnar Bragi Sveinsson, þingflokksformaður Framsóknar, sagði að ef lýsing sendiráðsmannsins væri röng þyrftu réttar upplýsingar að koma fram.

Guðfríður Lilja Grétarsdóttir, þingflokksformaður VG, sagði mikilvægast að áfram yrði málstaður Íslands kynntur erlendis. Hafnaði hún kenningum um að stjórnvöld reyndu að koma í veg fyrir þjóðaratkvæðagreiðslu.

Þór Saari, Hreyfingunni, sagði framgöngu sendiherra Íslands í Washington á fundinum hneykslanlega. Hann ætti að kalla heim og sjálfsagt væri að hann bæði forseta Íslands og þjóðina alla afsökunar á orðum sínum.

bjorn@frettabladid.is