Einn heilbrigðisstarfsmaður sviptur starfsleyfi í fyrra

Einn heilbrigðisstarfsmaður var sviptur starfsleyfi á árinu 2009, en það er alvarlegasta aðgerðin er sem gripið er til af hálfu heilbrigðisyfirvalda ef kærumál er staðfest. Auk þess var tveimur heilbrigðisstarfsmönnum veitt lögformleg áminning í framhaldi kvörtunarmáls og afrit sent til ráðherra eins og lög gera ráð fyrir. Þetta kemur fram í Talnabrunni, fréttabréfi landlæknis. Ekki kemur fram af hverju starfsmaðurinn var sviptur starfsleyfinu né hvar hann starfaði.

Landlæknisembættinu bárust alls 237 kvartanir árið 2009, en þær voru 282 árið 2008 og 274 árið 2007. Málin voru misjafnlega umfangsmikil og alvarleg, allt frá hnökrum í samskiptum til alvarlegra mistaka. Kvörtun er ekki skrásett sem slík nema hún leiði til athugunar af hálfu embættisins.

Röng eða ófullnægjandi meðferð var algengasta umkvörtunarefnið árið 2009 eins og verið hefur á undanfarin ár. Kvörtunum fækkaði þó borið

saman við árið 2008, bæði á hendur opinberum heilbrigðisstofnunum og einkastofum. Flestar kvartanir á hendur Landspítala

beindust að stóru klínísku deildunum.