Ívar: Ég mun skoða stöðu mína næsta sumar

Varnarmaðurinn Ívar Ingimarsson hjá enska b-deildarfélaginu Reading viðurkennir í viðtali við starðarblaðið Reading Evening Post að hann gæti vel verið að leika sitt síðasta tímabil með félaginu.

Núgildandi samningur hins 32 ára gamla Ívars við Reading rennur út næsta sumar en leikmaðurinn var að vonast til þess að geta framlengt samninginn um eitt ár og var tilbúinn að taka á sig launalækkun en samningaviðræður hafa ekki gengið sem skildi.

„Eins og staðan er núna þá lítur út yfir að samningur minn muni renna út næsta sumar án þess að ég semji aftur við Reading og ég get ekki sagt að ég sé sáttur með það því mér hefur liðið vel hjá félaginu.

Ég mun skoða stöðu mína næsta sumar en ég hef talað við knattspyrnustjórann [Brian McDermott] og hann veit allt um afstöðu mína og ég held að hann vilji halda mér áfram en félagið hlýtur að hafa sínar ástæður.

Svona er fótboltinn og ef það kemur í minn hlut að fara næsta sumar þá mun ég bara taka því," segir Ívar sem verður í liði Reading sem mætir WBA í endurteknum leik í enska FA-bikarnum.

Ívar hefur leikið með Reading frá árinu 2003 en þar á undan lék hann með Wolves og Brentford á Englandi auk þess sem hann fór eitt sinn á láni til Torquay.