Hollensk sendinefnd á leið til London

Hollensk sendinefnd heldur til London á morgun til fundar við íslensku samninganefndina um Icesave. Þetta kemur fram á vef Reuters. Hluti íslensku samninganefndarinnar hélt til London í gær og hefur beðið þar reiðubúinn til að ganga á fund með Bretum og Hollendingum.

Samkvæmt heimildum Reuters hafa Hollendingar ekki hug á að ræða frekar tilboðið frá því í síðustu viku. Um lokatilboð hafi verið að ræða af hálfu þeirra og Breta. Íslendingar verði að gangast við þeim grundvallarskilmálum sem þar kveðið á um.

Hollendingar og Bretar lögðu fram tilboð í síðustu viku sem fól í sér breytt vaxtakjör á Icesave láninu. Um var að ræða breytilega vexti með 2,75 prósenta álagi auk þess sem boðið var upp tvö ár án vaxta.