Reikna með verkföllum í mars

Félagsmenn í Félagi íslenskra flugumferðarstjóra (FÍF) samþykktu á aðalfundi félagsins á mánudagskvöld að fela stjórn og trúnaðarráði félagsins að hefja undirbúning atkvæðagreiðslu um boðun verkfalls. Í gærkvöldi útfærði svo trúnaðarráð félagsins atkvæðagreiðsluna nánar, það er hvers konar verkfallsaðgerðir félagsmenn fá um að velja.

Nokkra daga tekur að undirbúa atkvæðagreiðslu og greiða atkvæði, auk þess sem gefa verður lögbundinn fyrirvara, segir Ottó Garðar Eiríksson, formaður félagsins. Hann telur líklegt að lagt verði til að verkfall verði boðað fyrri hluta marsmánaðar. Spurður hvort um fleiri en eitt tímabundið verkfall verði að ræða, eins og oft hefur verið hjá flugumferðarstjórum, segir Ottó það líklegt.

Samningur FÍF við Samtök atvinnulífsins og Flugstoðir rann út í lok október síðastliðnum. Loftur Jóhannsson, formaður samninganefndar félagsins, segir að markmið flugumferðarstjóra sé að ná fram launahækkun í takt við aðrar stéttir í fluggeiranum.

Byrjunarlaun flugumferðarstjóra eru nú rúmlega 300 þúsund krónur á mánuði. Með vaktaálagi fara byrjunarlaunin nærri 400 þúsund krónum á mánuði. Launin hækka með starfsaldri og lífaldri. Þannig gæti 59 ára flugumferðarstjóri verið með um 570 þúsund krónur í laun fyrir dagvinnu, segir Loftur. Hann bendir á að laun flugumferðarstjóra í nágrannalöndunum séu á bilinu 70 til 160 prósentum hærri en hér á landi. - bj