ESB: Styrkja þarf sjálfstæði íslenskra dómstóla

Framkvæmdastjórn Evrópusambandsins leggur til að íslenska verði eitt af opinberum tungumálum ESB í áliti sem það gaf í dag út um aðildarumsókn Íslands að ESB.

Þá segir ennfremur í álitinu að styrkja þurfi sjálfstæðis íslenskra dómstóla. Einnig er bent á nauðsyn þess að styrkja reglur til að koma í veg fyrir hagsmunaárekstra milli hins opinbera og viðskiptalífsins.

Í álitinu kemur einnig fram að framkvæmdastjórnin telji Ísland fullnægja skilyrðum sem sett eru fyrir að hafnar verði aðildarviðræður.

Ákvörðun um að hefja aðildarviðræður við Ísland er hins vegar í höndum ráðherraráðs ESB. Búist er við að ráðherraráð ESB komi næst saman í síðustu viku marsmánaðar.

Bent er á að Ísland sé vel á vegi statt að því er varðar framkvæmd regluverks ESB á þeim sviðum sem falla undir EES og Schengen-samningana.

Á sviðum sem ekki falla undir EES og Schengen, svo sem sjávarútveg, landbúnað og hluta löggjafar um umhverfismál og fjárhagsmál, er nauðsynlegt að Ísland aðlagi löggjöf sína að reglum ESB.