United mun reyna að fá David Villa næsta sumar

Samkvæmt heimildum Daily Mirror er spænski landsliðsframherjinn David Villa hjá Valencia efstur á óskalista Manchester United næsta sumar.

Knattspyrnustjórinn Sir Alex Ferguson hjá United sendi til að mynda bróður sinn Martin, sem er fremsti njósnarinn innan raða United, til þess að fylgjast með leik Valencia og Getafe á dögunum þar sem framherjinn knái skoraði tvö mörk.

United reyndi einnig að fá Villa síðasta sumar en þá stoppaði allt á 45 milljón punda verðmiðanum sem spænska félagið skellta á Villa og því varð ekkert úr því.

Það er spurning hvað gerist næsta sumar en það er ljóst að United verður ekki eina liðið í baráttunni um Villa þar sem flest af fremstu félögum Evrópu fylgjast náið með gangi mála hjá kappanum.