Umfjöllun: Heppnir og þolinmóðir Keflvíkingar

Keflavík tryggði sér í kvöld langþráðan sigur í Pepsi-deild karla með því að leggja Fylkismenn í Árbænum, 2-1. Bæði mörk Keflvíkinga komu undir lok leiksins.

Keflavík hafði ekki unnið í deildinni síðan 27. júní og hefur síðan dregist aftur úr í toppbaráttunni. En eftir sigurinn í kvöld er ljóst að það má ekki afskrifa Keflvíkinga enn.

Fylkismenn voru reyndar sterkari aðilinn í fyrri hálfleik og hefðu átt að skora strax í upphafi leiks þegar að Albert Brynjar Ingason fékk tvívegis mjög góð færi. Í bæði skiptin bjargaði varnarmaður Keflavíkur.

Albert bætti þó fyrir þetta er hann skoraði úr víti eftir að Bjarni Hólm Aðalsteinsson fékk boltann í höndina í teignum. Markið var glæsilegt - Albert skaut föstu skoti í efra markhornið hægra megin.

Aðeins meira jafnræði var með liðunum eftir þetta en Fylkismenn fengu gott færi til að skora annað mark undir lok fyrri hálfleiksins. Þá átti Andrés Már fínan skalla rétt framhjá marki gestanna.

Keflvíkingar tóku þó völdin í seinni hálfleik og voru miklu meira með boltann. Illa gekk hins vegar að skapa sér færi og eftir því sem á leið á síðari hálfleikinn fóru Fylkismenn að beita hættulegri skyndisóknum. Valur Fannar Gíslason lét varnarmann Keflavíkur verja frá sér á marklínu þegar um stundarfjórðungur var til leiksloka.

En vendipunktur leiksins kom á 82. mínútu þegar að Jóhannes Valgeirsson dæmdi vítaspyrnu á Fylkismenn. Magnús Þórir Matthíasson féll í teignum eftir viðskipti við Þórir Hannesson. Sannarlega umdeildur dómur að Fylkismönnum fannst, sérstaklega þar sem að Þórir fékk að líta sína aðra áminningu í leiknum fyrir brotið sem virtist ekki gróft.

Guðmundur Steinarsson skoraði örugglega úr vítinu og lagði svo sjálfur upp sigurmarkið er hann stakk boltanum inn fyrir Fylkisvörnina á Jóhann Birni Guðmundsson. Hann klikkaði ekki einn gegn Fjalari í markinu og renndi boltanum í nærhornið.

Þetta var ekki í fyrsta sinn sem Fylkismenn ná forystu í leik í sumar en tapa henni niður. Þeir geta verið ósáttir en Keflvíkingar fögnuðu eðlilega vel og innilega í leikslok, enda hafði þolinmæði - með smá heppni líka - skilað þremur dýrmætum stigum í hús.

Það verður þó ekki tekið af Keflvíkingum að þeir spiluðu vel í síðari hálfleik og gerðu allt í þeirra valdi til að brjóta ísinn sem tókst svo á elleftu stundu.

Fylkir - Keflavík 1-2

1-0 Albert Brynjar Ingason, víti (21.)

1-1 Guðmundur Steinarsson, víti (82.)

1-2 Jóhann Birnir Guðmundsson (86.)

Fylkisvöllur. Áhorfendur: 856

Dómari: Jóhannes Valgeirsson (5)

Skot (á mark): 11-11 (5-5)

Varin skot: Fjalar 3 - Ómar 1

Hornspyrnur: 4-6

Aukaspyrnur fengnar: 11-15

Rangstöður: 7-3

Fylkir (4-3-3):

Fjalar Þorgeirsson 6

Andri Þór Jónsson 6

(51. Ásgeir Örn Arnþórsson 6)

Þórir Hannesson 6

Valur Fannar Gíslason 5

Tómas Þorsteinsson 5

Kristján Valdimarsson 5

(82. Davíð Ásbjörnsson -)

Ásgeir Börkur Ásgeirsson 6

Andrés Már Jóhannesson 7

Ingimundur Níels Óskarsson 4

(73. Jóhann Þórhallsson -)

Pape Mamadou Faye 4

Albert Brynjar Ingason 6

Keflavík (4-5-1):

Ómar Jóhannsson 5

(21. Lasse Jörgensen 6)

Guðjón Árni Antoníusson 6

(34. Paul McShane 6)

Bjarni Hólm Aðalsteinsson 5

Haraldur Freyr Guðmundsson 6

Alen Sutej 6

Hólmar Örn Rúnarsson 6

Einar Orri Einarsson 5

Jóhann Birnir Guðmundsson 6

Guðmundur Steinarsson 7 - maður leiksins

Magnús Sverrir Þorsteinsson 4

Magnús Þórir Matthíasson 5

(90. Hörður Sveinsson -)

Smelltu hér til að opna Boltavaktina og lesa lýsingu leiksins: Fylkir - Keflavík.