Bölmóður víki fyrir bjartsýni

Vísbendingar eru um að farið sé að sjá til sólar í íslensku efnahagslífi og á bölmóður að víkja fyrir bjartsýni. Þetta segir Steingrímur J. Sigfússon fjármálaráðherra í þriðju grein sinni af sex um stöðu mála eftir bankahrunið.

Steingrímur bendir á ýmis merki þess að efnahagslífið sé að taka við sér. Samdráttur í landsframleiðslu hafi reynst minni en svörtustu spár hafi gert ráð fyrir, atvinnuleysi hér sé minna en að meðaltali innan þeirra ríkja sem aðild eiga að Efnahags- og framfarastofnuninni (OECD) og Evrópusambandinu.

Steingrímur tekur sem dæmi að algjör viðsnúningur hafi orðið á vöru- og þjónustujöfnuði frá útrásartímanum fyrir hrun. Í stað mörg hundruð milljarða uppsafnaðs halla áður hafi afgangurinn numið um tvö hundruð milljörðum króna um mitt ár. Það ásamt öðru hafi stuðlað að verulegri styrkingu og stöðugra gengi krónunnar.

„Engir, ekki einu sinni svartsýnustu heimsendaspámenn, geta borið á móti því að mikill árangur hefur náðst og að við erum á réttri leið,“ skrifar Steingrímur.

- jab / sjá síðu 18