Töluverðar skattahækkanir í hrunfjárlögum

Gert er ráð fyrir töluverðum skattahækkunum í fjárlögum næsta árs sem Steingrímur J. Sigfússon fjármálaráðherra kynnti fyrir fréttamönnum í morgun. Fjármagnstekjuskattur hækkar úr 18% í 20%, tekjuskattur á fyrirtæki hækkar einnig i 20% og erfðafjárskattur hækkar úr 5 í 10%.

Þetta eru helstu skattahækkanirnar en að auki munu nokkrir aðrir skattstofnar hækka. Samtals er gert ráð fyrir að skattahækkanirnar skili um 11 milljörðum aukalega í tekjur til ríkissjóðs. Ekki er gert ráð fyrir hækkun tekjuskatts á einstaklinga.

Steingrímur sagði að hornsteinninn í fjárlögum fyrir næsta ár væri að ná aftur jöfnuði í rekstri ríkisins. Ríkissjóður hefði orðið fyrir gríðarlegum búsifjum í hruninu. Markmiðið hingað til og hér eftir hefði verið að hlífa velferðarkerfinu við niðurskurði. Þá væri þeim tekjulægstu hlíft við gerð skattaáætlana. Í fjárlagafrumvarpinu fyrir árið 2011 er gert ráð fyrir 33 milljarða niðurskurði.

Fjármálaráðherra sagði á blaðamannafundinum í morgun að í fjárlögunum fyrir næsta ár væru afleiðingar hrunsins á ríkisfjármálin að koma fram af fullum þunga. „Þetta er, ef eitthvað er, hin eiginlegu hrunfjárlög," sagði Steingrímur við fréttamenn.

Fjárlagafrumvarpinu verður útbýtt á Alþingi núna klukkan fjögur.