Upplýsingasíða um þjóðaratkvæðagreiðsluna opnuð

Vefsíðan thjodaratkvaedi.is hefur verið opnuð í tilefni af þjóðaratkvæðagreiðslunni 6. mars um Icesavelögin sem Alþingi samþykkti í árslok 2009 og forsetinni neitaði að staðfesta.

„Þar eru útskýrð á hlutlausan hátt meginatriði máls sem varða atkvæðagreiðsluna, ástæður hennar og mögulegar afleiðingar," segir í tilkynningu frá dómsmála- og mannréttindaráðuneytinu.

Ráðuneytið fól Lagastofnun Háskóla Íslands að semja kynningarefni fyrir almenning vegna atkvæðagreiðslunnar og auk vefsíðunnar verður gefinn út bæklingur sem dreift verður um allt land síðari hluta næstu viku. Almannatengslafyrirtækið Athygli sá um hönnun og tæknivinnu vegna vefjarins, sem og framsetningu efnis, bæði á vefnum og í bæklingnum.

Fram kemur í tilkynningunni að vefsíðan er ekki umræðuvettvangur en notendum hennar sé vísað á ýmsa vefi stjórnmálahreyfinga, stofnana, hagsmunasamtaka og annarra sem hafa með einum eða öðrum hætti fjallað um Icesave málið eða einstaka þætti þess.