Hermann: Þurfum bara að einbeita okkur að okkar vinnu

„Fólk er að vinna hörðum höndum á bak við tjöldin til þess að laga fjárhagsstöðuna hjá félaginu. Við leikmennirnir þurfum bara að einbeita okkur að okkar vinnu. Við þurfum bara að halda haus og fara inn á völlinn og hala inn stig," segir Hermann Hreiðarsson um stöðu mála hjá Portsmouth í viðtali við Sky Sports fréttastofuna.

„Félagið verður að lifa þetta af. Það er mikið í húfi og nauðsynlegt að allir haldi áfram að vinna sína vinnu eftir bestu getu við þessar erfiðu aðstæður," segir Hermann.

Enginn endir virðist vera á vandræðum Portsmouth innan vallar sem utan en félagið situr á botni ensku úrvalsdeildarinnar og er þess utan stórskuldugt og sótti í dag um undanþágu til stjórnar ensku úrvalsdeildarinnar til þess að fá að selja leikmenn núna þrátt fyrir að félagaskiptaglugginn sé lokaður.