Háskólarnir einn lykill að lausn efnahagsvandans

Kristín Ingólfsdóttir, rektor Háskóla Íslands, sagði við brautskráningu nærri 500 kandídata í dag að háskólarnir væru einn lykill að lausn efnahagsvanda Íslands.

 

478 kandídatar voru brautskráðir frá skólanum í dag en athöfnin fór fram í Háskólabíói. Kandídatar voru brautskráðir af öllum fræðasviðum Háskóla Íslands með 482 prófgráður.

Kristín lagði áherslu á það í brautskráningarræðu sinni í dag að nú, þegar Ísland standi á krossgötum, sé Háskóli Íslands, og háskólar landsins í heild, einn af lyklunum að lausn vandans sem við er að glíma. Kristín sagði að ef við Íslendingar stæðum rétt að uppbyggingu og stuðningi við háskólana sköpuðum við frjóan jarðveg fyrir nýsköpun af öllu tagi.   

Kristín sagði mikilvægt á þessum erfiðu tímum að okkur tækist að skapa þann skilning í samfélaginu, og meðal ráðamanna, að Háskóli Íslands og háskólarnir í heild séu ekki viðfangsefni til niðurskurðar heldur lykill að lausn vandans. Hún sagði mikilvægt að stjórnvöld hér dragi lærdóm af því sem gert hefur verið í öðrum löndum, til dæmis í Finnlandi, þar sem lögð var áhersla á uppbyggingu háskólastarfs sem leið út úr kreppu.

Þá beindi Kristín því til kandídatanna að mikilvægt væri við erfiðar kringumstæður að tapa ekki getunni til að hugsa stórt. „Það örlar á þeirri hugsun í íslensku samfélagi, eftir atgang síðustu missera, að við megum ekki lengur leyfa okkur að hugsa stórt. Þetta eru sennilega eðlileg viðbrögð við því sem á undan er gengið. En við megum fyrir alla muni ekki láta taka frá okkur viljann til að byggja að nýju, getu til að hugsa stórt og staðfastan ásetning,” sagði Kristín.