Íkveikja líklegasta skýringin á brunanum

Eldur kom upp í bíl við Unufell í Breiðholtinu aðfaranótt mánudags. Þegar lögregla og slökkvilið kom á staðinn stóð bíllinn, Toyota Corolla, í ljósum logum.

„Það bendir allt til þess að það hafi verið kveikt í honum,“ segir Skúli Heimir Sigurjónsson, bifvélavirki og eigandi bílsins. „Bíllinn hefur ekki verið hreyfður síðan á föstudag og ég var bara vakinn hér af lögreglunni þegar bíllinn var alelda hér fyrir utan. Það er engin önnur skýring en íkveikja.“

Eldurinn teygði sig í þakskegg hússins og í ljós og hurð á bílskúrnum. Tveir dælubílar slökkviliðsins voru kallaðir á staðinn, en sá síðari var afturkallaður.

Pétur Guðmundsson, varðstjóri hjá lögreglunni í Reykjavík, segir eldinn í bifreiðinni hafa komið upp undir vélarhlífinni og mælaborði.

„Það skíðlogaði í öllum bílnum þegar komið var á staðinn og bifreiðin er gjörónýt,“ segir hann. „Það er ekki hægt að segja að svo stöddu hvort um íkveikju hafi verið að ræða.“

Greiðlega gekk að slökkva eldinn, en nokkrar skemmdir urðu á nærliggjandi bílum og byggingum. - sv