Vissi að Gerrard myndi sleppa

Sir Alex Ferguson, stjóri Man. Utd, er allt annað en sáttur við störf aganefndar enska knattspyrnusambandsins sem hann segir vera óstarfhæfa.

Ferguson finnst það frekar fúlt að Rio Ferdinand hafi fyrr í vetur verið dæmdur í fjögurra leikja bann fyrir að slá til Craig Fagan, leikmanns Hull.

Honum finnst það fúlt í ljósi þess að Steven Gerrard hefur í tvígang sloppið við refsingu þrátt fyrir afar vafasama hegðun.

Fyrst gaf Gerrard dómara dónamerki og síðan kýldi hann Michael Brown með olnboganum.

„Það er ekkert samræmi í þessum dómum. Þessi aganefnd er óstarfhæf," sagði Ferguson reiður.

„Ég átti ekki von á því að Gerrard fengi dóm því þessi aganefnd er algjörlega vanhæf og ég veit ekkert hvað þessir menn séu eiginlega að gera."