Riera sagður vera á leið til CSKA Moskva

Hermt er í breskum fjölmiðlum í dag að Spánverjinn Albert Riera verði sendur frá Liverpool til Moskvu og það strax í þessari viku. Mun CSKA Moskva vera til í að taka á móti honum.

Riera sá til þess að ferill hans hjá Liverpool væri á enda er hann hraunaði hraustlega yfir Rafa Benitez, stjóra Liverpool, í síðustu viku. Sagði meðal annars að Benitez lifði í fílabeinsturni.

Rússnesk félög mega enn kaupa leikmenn og því ætlar Liverpool að nota tækifærið og losa sig við leikmanninn.

Talið er að félagið fái samt aðeins hluta af þeim 8 milljónum punda sem það greiddi fyrir leikmanninn á sínum tíma.

Riera sjálfur vill fara til Spánar eða Ítalíu en Liverpool vill frekar hafa hann í Moskvu.