Kærustu Carls Svíaprins ekki boðið í brúðkaup Viktoríu

Sænska konungsfjölskyldan er aftur komin í sviðsljós fjölmiðla á neikvæðan hátt, nú vegna fregnar um að kærustu Carl Philip Svíaprins sé ekki boðið í brúðukaup stóru systur hans Viktoríu prinsessu sem haldið verður seinna í mánuðinum.

Fréttin kemur í kjölfar þess að sænsku konungshjónin Karl Gústaf og Sylvia Sommerlath voru nýbúin að jafna sig á hneykslinu í kringum trúlofun hinnar dóttur sinnar, Magdalenu, þegar kærasti hennar var gripinn í bólinu með norskri fegurðardís og látinn róa.

Sænska blaðið Expressen birtir forsíðufrétt um helgina þess efnis að kærustu Carl Philip væri ekki boðið í brúðkaupið. Sú heitir Sofia Hellquist og hefur víst komið fram léttklædd í karlatímariti.

Hinsvegar er fyrrum kærustu prinsins, Emmu Parnald, boðið í bæði vígsluna sjálfa og aðalveisluna á eftir. Það ku vera einn stærsti draumur drottningarinnar að Carl Philip sjái ljósið að nýju og taki aftur saman við Emmu. Hún mun tilheyra fjölskyldu sem þykir samboðin konungsfjölskyldunni.

Fram kemur í fréttinni að Sofia Hellquist, sem er 25 ára stúlka úr sveit í Svíþjóð hafi gist hjá prinsinum nokkrum sinnum í konungshöllinni. Hún kom fram frekar léttklædd í tímaritinu Slitz fyrir fimm árum og var raunar forsíðustúlka þess.

Auk þess hefur Sofia tekið þátt í raunveruleikaþættinum Paradísarhótelið þar sem lítið fer fyrir fatnaði á þátttakendum. Slíkt þykir ekki fínt í sænskum aðalsheimi.