Ferguson hefur enn tröllatrú á Berbatov

Búlgarinn Dimitar Berbatov fær annað tímabil til þess að sanna sig hjá Man. Utd. Hann olli gríðarlegum vonbrigðum í fyrra og telja margir að ástæða þess að hann fái annað tækifæri í ár sé sú að enginn hafi viljað kaupa hann í sumar nema fyrir skiptimynt.

Sir Alex Ferguson, stjóri Man. Utd, segist enn hafa tröllatrú á Búlgaranum þó svo hann hafi aðeins skorað 26 mörk í 86 leikjum fyrir United.

"Hann sýndi frábær tilþrif gegn Celtic og það undirstrikaði hversu frábær leikmaður hann er. Það verður aldrei tekið frá honum að hann er frábær leikmaður," sagði Ferguson.