Rekstur Konukots tryggður út árið

Reykjavíkurdeild Rauða Kross Íslands og Reykjavíkurborg hafa endurnýjað samning um áframhaldandi rekstur Konukots, næturathvarfs fyrir heimilislausar konur í Reykjavík. Samningurinn gildir til ársloka 2010.

Samkvæmt samningnum ber Reykjavíkurdeild Rauða Kross Íslands faglega og fjárhagslega ábyrgð á rekstri Konukots en deildin fær rekstrarfé og húsnæði frá Velferðarsviði, eftir því sem fram kemur á vef Reykjavíkurborgar. Að auki leggur Velferðarsviðs til faglegan tengilið en hlutverk hans er að bjóða gestum Konukots upp á reglulega viðtalstíma og vinna að lausn á félagslegum og húsnæðislegum vanda þeirra.

Átta heimilislausar konur eiga athvarf í Konukoti á næturnar. Þar fá konurnar léttan málsverð á kvöldin auk morgunverðar. Þar geta þær jafnframt þvegið af sér og baðað sig. Auk þess fá þær föt þar ef þær þurfa á því að halda.

Jórunn Frímannsdóttir, formaður Velferðarráðs, segir rekstur Konukots afar mikilvægan og ekkert síður mikilvægari en svo margt annað nú um stundir.