Vilja ekki sjá Stubbahús Neville

Um 300 hundruð nágrannar Gary Neville eru brjálaðir út í bakvörð Man. Utd sem hefur í hyggju að byggja umhverfisvænt, neðanjarðarhús í ætt við húsið sem Stubbarnir, eða Teletubbies, búa í.

Nágrannarnir héldu fjölmennan fund á dögunum þar sem fyrirætlunum Neville var harðlega mótmælt. Krefjast nágrannarnir þess að bæjaryfirvöld meini Neville að byggja húsið sem á óneitanlega að vera sérstakt.

„Af hverju ættum við að þurfa að horfa upp á þetta ljóta hús? Bara af því hann á peninga? Ef það verður gefið leyfi á þetta þá gætu sprottið upp fleiri Stubbahús," sagði einn nágranna Neville.

Hægt er að sjá tölvuteiknaða mynd af því hvernig þetta afar sérstaka hús eigi að líta út hér.