Krafðist þess að verða stungið í steininn

Heldur sjaldgæft er að menn krefjist þess að vera vistaðir í fangageymslu lögreglunnar. Sú var þó raunin þegar lögreglan var kölluð til í fjársvikamáli á höfuðborgarsvæðinu. Að sögn lögreglu hafði karl um fimmtugt neitað að greiða fyrir þjónustu sem hann hafði sannarlega notið.

„Lögreglan reyndi að leysa málið á vettvangi því aðilinn sagðist vera með fjármuni meðferðis og því borgunarmaður fyrir reikningnum," segir í tilkynningu. „Maðurinn, sem var í annarlegu ástandi, stóð hinsvegar áfram fast á sínu og harðneitaði að borga. Fór svo að hann var fluttur á lögreglustöð en þess hafði maðurinn óskað og jafnframt að hann yrði vistaður í fangaklefa."

Ekki var fallist á þessa beiðni mannsins enda ónauðsynlegt að hafa manninn í haldi að sögn lögreglunnar og var honum því gert að halda sína leið. „Gekk það treglega og þurfti að beita fortölum. Að lokum yfirgaf maðurinn lögreglustöðina, allt annað en sáttur með þessi málalok."