Árni Johnsen búinn að skila

Árni Johnsen, þingmaður Sjálfstæðisflokks, hefur skilað Ríkisendurskoðun yfirlýsingu um að kostnaður hans vegna prófkjörs fyrir síðustu kosningar hafi verið undir 300.000 krónum.

Árni átti að skila þessum upplýsingum fyrir 25. október 2009 og var lengi vel eini þingmaðurinn sem var ekki á yfirliti Ríkisendurskoðunar um þá sem höfðu skilað.

Árni sjálfur sagðist hafa skilað upplýsingunum, en gögnin hefðu misfarist einhvers staðar. Skil Árna eru dagsett 18. janúar á heimasíðu Ríkisendurskoðunar.

Samkvæmt lögum um fjármál stjórnmálasamtaka eiga frambjóðendur að skila þessum upplýsingum innan sex mánaða frá því að kosningar fara fram. Brot geta varðað sex ára fangelsi. Nú teljast allir frambjóðendur Framsóknar, Frjálslynda flokksins og Samfylkingar hafa skilað upplýsingunum.

Þrír frambjóðendur VG, þeir Paul Nicolov og Þorvaldur Þorvaldsson í Reykjavík, ásamt Sigurði Inga Björnssyni á Hvammstanga, hafa engu skilað.

Einn frambjóðandi Sjálfstæðisflokks hefur ekki skilað, Bergþór Ólason á Akranesi.

Borgarahreyfing stillti upp á lista og þarf því engu að skila. - kóþ