Umboðsmaður Didier Drogba: Manchester City að reyna að kaupa hann

Didier Drogba gæti verið á leiðinni til Manchester City ef marka má það sem umboðsmaður hans segir. Thierno Seydi var í viðtali hjá útvarpsstöð í Monte Carlo.

„Í dag er hann hjá Chelsea. Kannski gerist eitthvað óvænt fyrir 31. ágúst," sagði Thierno Seydi. „Ég er ekki að tala um eitthvert lið. Ég hef einungis talað við City," sagði Seydi.

Roberto Mancini, stjóri Manchester City, er að leita sér að nýjum framherja og lítið gengur hjá honum að fá Edin Dzeko frá Wolfsburg.

„Á hans aldri er ekki möguleiki að fela fyrir mönnum peningahliðina. Félag sem vill fá Didier þarf að borga fyrir hann uppsett verð," sagði Seydi en Carlo Ancelotti, stjóri Chelsea, gaf í skyn um síðustu helgi að Drogba yrði áfram hjá félaginu.