Stjórnmálamenn stýri ekki fjármálakerfinu

Ég er algerlega mótfallin því að stjórnmálamenn handstýri fjármálakerfinu, sagði Jóhanna Sigurðardóttir forsætisráðherra á Viðskiptaþingi í dag.

„Þeim sjónarmiðum hefur verið haldið fram að ríkisstjórnin ætli að láta það afskiptalaust að sömu persónur og leikendur og fóru með stórt hlutverk í fjármála- og viðskiptalífinu fyrir hrun, verði áfram við stjórnvölinn. Að þessu tilefni vil ég láta koma fram að ég er algerlega mótfallin því að stjórnmálamenn handstýri fjármálakerfinu," sagði Jóhanna.

Hún sagði að slík handstýring væri nú talin upphafið að bankahruninu þegar einkavæðing bankanna fór út af sporinu árið 2002 og sérvöldum aðilum hafi verið afhent völdin í bankakerfinu án þess að þeir reiddu fram annað en lánsfé. „Og því fór sem fór," sagði Jóhanna.

Jóhanna sagði að eitt mikilvægasta verkefni um þessar mundir væri að endurreisa traust á íslensku samfélagi. Þetta verkefni snúi ekki bara að stjórnvöldum heildur einnig að atvinnulífinu. Það þurfi meira til en lög, reglur eða fyrirmæli stjórnvalda. Það þurfi hver að líta í eigin barm. Engu að síður þurfi stjórnvöld að leggja sitt af mörkum með betra lagaumhverfi.