Eminem: Nýr og betri maður

Rapparinn Eminem sagði í nýlegu viðtali við New York Times að hann væri fylgjandi því að samkynhneigt fólk fái að ganga í hjónaband. Rapparinn, sem þekktur er fyrir klúra texta og niðrandi orð í garð kvenna og samkynhneigðra segist hafa vaxið upp úr barnaskapnum.

„Mér leið ef til vill svona á þeim tíma sem ég lét þessi orð falla, en ég hef þroskast mikið síðan þá og sýn mín á lífið hefur einnig breyst mikið undanfarin ár. Ég trúi því að ef tvær manneskjur elska hvor aðra þá ættu þær að fá að giftast. Mér finnst að allir ættu að hafa sömu réttindi til óhamingju. Ef það er það sem samkynhneigðir vilja, þá segi ég verði þeim að góðu,“ sagði tónlistarmaðurinn sem vill meina að hann sé nú nýr og betri maður.