Stórfelld misnotkun í heyrnleysingjaskólum

AP Tvö mál hafa komið upp með stuttu millibili um stórfellda og áralanga misnotkun kaþólskra presta á nemendum í heyrnleysingjaskólum í Bandaríkjunum og á Ítalíu. Páfagarður er sakaður um að hafa hylmt yfir brotin í báðum tilfellum.

Stórblaðið New York Times greindi frá því í vikunni að árið 1996 sendi erkibiskupinn í Wisc­onsin bréf til Páfagarðs og tilkynnti um prest í Milwaukee, sem grunaður var um að hafa misnotað allt að 200 nemendur í heyrnleysingjaskóla á árabilinu 1950 til 1975.

Erindið lenti á borði Benedikts XVI., sem þá hét Joseph Ratzinger, og var yfirmaður svonefnds trúarráðs kaþólsku kirkjunnar og hafði meðal annars umsjón með viðurlögum við agabrotum kirkjunnar þjóna. Erkibiskupinn fékk engin svör frá Ratzinger. Sjö mánuðum síðar fékk hann boð frá næstráðanda Ratzinger um að beita prestinn viðeigandi viðurlögum kirkjunnar, en gera það með leynd. Stuttu síðar var sú skipun dregin til baka þar sem presturinn var sagður hafa gert yfirbót, auk þess sem brotin væru fyrnd.

Hitt málið kom fram í dagsljósið í fyrra, þegar 67 fyrrverandi nemendur í heyrnleysingjaskóla í Veróna á Ítalíu sökuðu 24 presta um áralangar nauðganir og misnotkun. Biskupinn í Veróna neitaði þessum ásökunum í fyrstu en eftir að einn prestanna játaði að hafa brotið á nemanda var efnt til innanhúss­rannsóknar. Þar var aftur á móti ekki rætt við nemendurna fyrrverandi en eftir að málið komst í hámæli hafa talsmenn kirkjunnar heitið að bæta úr því.

Hneykslismál skekja kaþólsku kirkjuna um þessar mundir. Vika er síðan páfi bað fórnarlömb kynferðisofbeldis á Írlandi afsökunar á sinnuleysi kirkjunnar og í Þýskalandi er verið að rannsaka mál tveggja presta og tveggja nunna sem grunuð eru um að hafa beitt börn ofbeldi.

Vatíkanið gagnrýndi fréttaflutning New York Times harðlega og segir hann lið í rógsherferð gegn páfanum, sem gangi út á að kenna kaþólsku kirkjunni um útbreidda meinsemd sem sé alls ekki bundin við hana.

bergsteinn@frettabladid.is