Sjálfstraust atvinnulausra byggt upp

Virkir og óvirkir atvinnuleitendur eru leiddir saman í nýju verkefni Rauða krossins sem ber heitið Félagsvinir atvinnuleitenda. Markmið verkefnisins er að virkja þá sem hafa verið atvinnulausir lengi.

Rauði krossinn hélt námskeið fyrir sjálfboðaliða í janúar, þar sem þeim var meðal annars veitt fræðsla og þjálfun til að leiðbeina öðrum atvinnuleitendum í starfsleit sinni. Áhugasamir sjálfboðaliðar voru boðaðir í viðtöl og voru sautján valdir úr hópnum til að sitja fyrsta námskeiðið. Þeir hafa allir verið virkir í atvinnuleit og sjálfboðastarfi.

Að sögn Fjólu Einarsdóttur hjá Rauða krossinum hrynur sjálfstraust atvinnulausra oft niður eftir sex mánuði eða svo.

„Það er mjög mikilvægt að byggja það upp aftur. Margt er í boði fyrir atvinnulausa, til dæmis í fullorðinsfræðslu, og félagsvinaverkefnið er leið til að benda á það.“ Samstarfsmenn Rauða krossins í verkefninu eru Efling, Iðan, Fræðslumiðstöð atvinnulífsins, Fræðsluskrifstofa Rafiðnar, Mímir og Vinnumálastofnun.

Í dag klukkan hálf eitt er fundur fyrir atvinnulausa í Rauðakrosshúsinu Borgartúni 25 og þar verða umræður um líðan atvinnuleitenda eftir langa leit að vinnu, þangað eru allir velkomnir. Sjálfboðaliðar úr hópi Félagsvina stýra fundinum.- sbt