Engir ráðamenn afhenda Grímuna - Ólafur Ragnar áfram verndari

Engir ráðamenn munu veita verðlaun á Grímunni samkvæmt Ásu Richardsdóttur, forseta Leiklistarsambandsins. Þetta var ákveðið af stjórn sambandsins í apríl að undangengnum fundi í fulltrúaráði.

„Þar var rætt um að upphefja gildi hátíðarinnar sjálfrar sem uppskeruhátíð sviðslistamanna og þá kom upp sú hugmynd að hafa sviðslistafólki sjálft í forgrunni," segir Ása. Hún tekur þó fram að öllum ráðamönnum hafi verið boðið og þeir séu að sjálfsögðu velkomnir.

Leikskáldið Jón Atli Jónsson sendi frá sér tilkynningu í gær þar sem hann sagðist hafna því að taka við tilnefningum til Grímunnar þar sem Ólafur Ragnar Grímsson, forseta Íslands, er verndari hátíðarinnar.

Það var ákveðið árið 2003 að gera forsetann að verndara Grímunnar að sögn Ásu.

„Þeirri ákvörðun hefur ekki verið breytt,“ bætir hún svo við.

Tilnefningarnar verða kynntar á morgun klukkan fjögur í Þjóðleikhúskjallaranum. Aldrei hafa jafn mörg sviðsverk keppst um tilnefningar, eða 96 leikrit. Þá hafa aldrei jafn mörg dansverk verið um hituna, eða 26 verk.