Carragher frá í þrjá mánuði

Jamie Carragher, varnarmaður Liverpool, er kominn í langt jólafrí. Hann varð fyrir alvarlegum meiðslum í leiknum gegn Spurs á sunnudag er hann fór úr axlarlið.

Hann hefur nú staðfest að hann verði frá næstu þrjá mánuðina vegna meiðslanna.

"Ég mun fara í aðgerð í lok vikunnar. Venjan er að það taki menn 12 vikur að jafna sig eftir slíka aðgerð. Ég vildi gjarna koma fyrr til baka en ég verð að vera þolinmóður og leyfa öxlinni að jafna sig," sagði Carragher.

"Ég kem því vart til baka fyrr en seint í febrúar eða snemma í mars. Mér finnst alltaf mjög erfitt að vera meiddur og ég hef verið heppinn á mínum ferli því ég hef sjaldan meiðst. Nú fékk ég það aðeins í bakið."