Þurfum að hjálpa Tevez meira

Joe Hart, markvörður Man. City, hefur beðið félaga sína vinsamlegast um að bæta sinn leik svo Carlos Tevez þurfi ekki að bera liðið á herðum sér mikið lengur.

Tevez hefur verið yfirburðamaður hjá City í vetur og þegar hann hefur ekki átt góðan dag hefur City oftar en ekki gengið illa.

"Það er búið að kalla okkur eins manns lið og það er ekkert skrítið þegar sá maður er talsvert betri en flestir leikmenn plánetunnar," sagði Hart.

"Við erum að reyna að hjálpa Carlos. Hann veit að það er ekki ætlast til að hann beri okkur alla leið. Mér finnst þetta vera að koma. Strákarnir eru að opna fyrir hann og öfugt.

"Við eigum fullt af hæfileikaríkum mönnum eins og David Silva. Hann hefur átt það til að taka yfir leiki og mun halda áfram á sömu braut."