Skipulagsbreytingar á RÚV

Skipulagsbreytingar standa yfir á yfirstjórn RÚV. Til stendur að sameina innlenda dagskrárdeild sjónvarps og innkaupadeild fyrir erlent efni. Þá verður ráðinn mannauðsstjóri í fyrirtækinu.

Páll Magnússon útvarpsstjóri segir að hugmyndin með því að sameina dagskrárdeildarnar sé einkum sú að undirstrika það að dagskráin í sjónvarpinu sé ein heild. „Það þarf að hugsa hana sem eina heild en ekki aðskilda parta af erlendu og innlendu efni," segir Páll. Hann segir að gamla fyrirkomulagið hafi átt sér ákveðnar sögulegar skýringar. Ný þyki hinsvegar rökréttara fyrirkomulag að dagskrárstjórnin sé á einni hendi.

Páll segir að á RÚV hafi þess verið freistað að hafa yfirbygginguna eins litla og hægt er þannig að sem mestur hluti af tekjunum færi í dagskrárgerð. Hins vegar telji fyrirtækið um 280 starfsmenn og það hafi verið örar breytingar á því. Mikið mál sé að halda rétt á starfsmannamálum. „Það má segja að það sé í takt við tímann að leggja meiri rækt við þennan hluta af starfseminni," segir Páll.