Riera spenntur fyrir Rússlandi

Spænski vandræðapésinn hjá Liverpool, Albert Riera, er hugsanlega á leið til rússneska félagsins CSKA Moskva og þvert á það sem menn héldu þá er hann spenntur fyrir því að fara þangað.

„Mér finnst Rússland vera mjög spennandi kostur. Þetta er ein af virtari deildunum í Evrópu og félagaskiptaglugginn þar er enn opinn," sagði Riera sem slátraði ferli sínum hjá Liverpool með opinberri árás á stjóra Liverpool, Rafa Benitez, ásamt því sem hann sagði Liverpool vera sökkvandi skip.

„Ef ég spila reglulega þar þá gæti ég líka tryggt mér farseðilinn á HM í sumar. Ég er að vonast til þess að mín mál fáist á hreint fyrir lok vikunnar."