Segir afstöðu Vinstri grænna það sorglegasta á ferlinum

Virkjana á Hengilssvæðinu gætu beðið sömu örlög og virkjana í neðri Þjórsá, en í forystusveit Vinstri grænna er fullyrt að skipulagsferli þeirra sé ólöglegt. Bæjarstjóri Ölfuss segir afstöðu Vinstri grænna það sorglegasta sem hann hafi orðið vitni að á ferlinum.

Tæpum mánuði eftir að Svandís Svavarsdóttir umhverfisráðherra stöðvaði virkjanir í neðri Þjórsá, með því að neita að staðfesta aðalskipulag, benda tveir aðrir áhrifamenn Vinstri grænna á að samskonar rök kunni að gilda um virkjanir á Hengilssvæðinu. Í grein í Fréttablaðinu síðastliðinn miðvikudag kemur fram það sjónarmið Atla Gíslasonar alþingismanns og Bergs Sigurðssonar, framkvæmdastjóra þingflokks Vinstri grænna, að rétt eins og Landsvirkjun hafi greitt fyrir skipulagsvinnu við Þjórsá, þá hafi Orkuveita Reykjavíkur með samkomulagi við Sveitarfélagið Ölfus í reynd keypt sér skipulag fyrir virkjanir á Hengilssvæðinu.

En óttast bæjarstjóri Ölfuss að virkjanaáform þar hljóti sömu örlög í höndum umhverfisráðherra og gerðist við Þjórsá?

Ólafur Áki Ragnarsson kveðst ekki sjá rök fyrir því og hann hafi heldur ekki séð rök fyrir stöðvun skipulags við neðri hluta Þjórsá.

"Ég held bara að fólk sé komið langt langt út fyrir skynsemismörk í þessu," segir Ólafur Áki. Bæjarstjórinn kveðst undrast markmið forystumanna Vinstri grænna á sama tíma og sveitarstjórnarmenn séu að reyna að byggja upp atvinnulífð. Hann segir þingmenn og framkvæmdastjóra Vinstri grænna rífa niður það sem verið sé að reyna að vinna og brjóta á bak aftur fólk sem sé að reyna að standa á bak við atvinnuuppbyggingu í landinu og snúa hjólum atvinnulífsins við.

"Þetta er nú svona það sorglegasta sem maður hefur orðið vitni að síðan ég byrjaði í sveitarstjórnarmálum fyrir 24 árum," segir Ólafur Áki.