Unnur G. biður Silju Báru afsökunar

Unnur G. Kristjánsdóttir, formaður nefndar um erlenda fjárfestingu, hefur sent RÚV yfirlýsingu vegna ummæla Silju Báru Ómarsdóttur, fulltrúa Vinstri græna í nefndinni, í hádegisfréttum Ríkisútvarpsins. Þar sagði Silja formanninn hafa lagt að sér að sitja hjá við afgreiðslu álits nefndarinnar á kaupum Magma á HS Orku í gegnum sænskt dótturfélag, ella væri ríkisstjórnarsamstarfið í hættu.

Unnur segir Silju vitna til einkasamtala þeirra í vetur þar sem hún hafi tjáð skoðun sína á að afstaða Silju stæðist ekki lög og mat sérfræðinga. Þá hafi Unnur einnig rætt um áhrif málsins á ríkisstjórnarsamstarfið. Unnur hafi talið að Silja væri ekki viðkvæm fyrir slíku enda kenni hún alþjóðastjórnmál í Háskóla Íslands. Unnur biður Silju afsökunar á að hafa valdið henni óþægindum með rökræðu sinni, segir í frétt RÚV.