Lögreglan endurgreiddi dópsmyglara eina milljón auk vaxta

Fíkniefnalögreglan þurfti að skila dæmdum dópsmyglara einni milljón króna í reiðufé sem lögreglan hafði haldlagt vegna gruns um að féð væri illa fengið. Dópsmyglarinn fékk vexti á fé sitt greidda frá lögreglunni.

Nýlega voru þrír Litháar dæmdir fyrir tilraun til að smygla tæpum þremur kílóum af amfetamíni hingað til lands en efnin voru falin í BMW bifreið sem kom til Íslands með Norrænu.

Áður en dómurinn féll reyndi einn smyglaranna, Mindaugas Strimaitis, að komast úr landi en hann var gripinn af lögreglumönnum í Leifsstöð. Í fórum sínum var Mindaugas með eina milljón króna í í fjórum mismunandi gjaldmiðlum sem lögregla haldlagði vegna gruns um að þar væri gróði af fíkniefnasölu.

Mindaugas og félagar hans voru skömmu síðar dæmdir í 2-3 ára fangelsi fyrir smyglið en af einhverjum ástæðum gleymdist að leggja fyrir dómara kröfu um að milljónin hans Mindaugasar yrði gerð upptæk.

Lögmaður á hans vegum mætti því til lögreglu fyrir helgi og sótti milljónina. Hann rukkaði þar auki lögreglu um innlánsvexti af fénu fyrir þann tíma sem það var í hennar vörslu.