Ökumenn sektaðir í fyrsta sinn á menningarnótt

Stöðumælaverðir og lögreglumenn munu sekta þá sem leggja ólöglega í miðborg Reykjavíkur á menningarnótt um næstu helgi. Þetta er i fyrsta sinn sem þetta er gert á þessum degi, segir Kolbrún Jónatansdóttir, framkvæmdastjóri Bílastæðasjóðs.

Kolbrún segir ástæðuna vera þá að staðan á bílastæðamálum á stærstu hátíðisdögum borgarinnar sé orðin skelfileg. „Ástandið í Þingholtunum og svona. Það liggur oft við að sjúkrabílar og slökkvibílar, ef það kæmi eitthvað fyrir, að þeir komist ekki leiðar sinnar," segir Kolbrún. Hún bætir þó við að sektir komi ekki í veg fyrir að fólk leggi þannig að það hindri bíla sem eru í neyðarakstri. Slíkir bílar séu einfaldlega dregnir í burtu með kranabíl. Engu að síður sé markmiðið með sektunum að fá fólk til að leggja betur. „Við viljum að fólk hætti þessu Við hvetjum alla til að fara í strætó. Við erum ekki að leita eftir tekjunum," segir Kolbrún í samtali við Vísi.

Kolbrún segir að bæði stöðumælaverðir og lögreglumenn verði að störfum við að sekta þá ökumenn sem leggi bílunum ólöglega. Hún hvetur fólk einfaldlega til að hugsa sinn gang áður en það heldur í bæinn á menningarnóttina.