Allardyce þolir ekki Benitez

Sam Allardyce, stjóri Blackburn, er ekki hættur að rífast við Rafa Benitez, stjóra Liverpool, en þeir hafa verið að skiptast á skotum síðustu vikur.

Benitez sagði í kaldhæðni eftir leik liðanna á dögunum að Barcelona tæki Blackburn-liðið sér til fyrirmyndar þegar kæmi að því að spila fallegan fótbolta.

Allardyce er nú ekki vanur að sitja þegjandi undir skotum og telur sig vita af hverju Benitez hati sig.

„Þetta var góð brella hjá Benitez til þess að fela hversu lélegt liðið hans var. Þetta er ekki í fyrsta skipti sem hann kýs að vera á persónulegum nótum og hann hefur gert þetta í mörg ár. Þess vegna líkar mér ekki við manninn og ég veit að honum líkar ekki við mig," sagði Allardyce.

„Ég læt persónulega skotin eiga sig í hans garð. Vissulega tekst mér samt að fara í taugarnar á honum en það er allt hluti af leiknum. Okkar rifrildi mun líklega ekki enda fyrr en annar okkar hættir að þjálfa í deildinni," sagði Stóri Sam og bætti við að Pep Guardiola, þjálfari Barcelina, hefði ekki haft samband til þess að fá ráð í því hvernig ætti að spila fótbolta.