Sum sveitarfélögin borga ekki tíundina

Mörg sveitarfélög virðast ekki hafa brugðist við lögum um fjármál stjórnmálasamtaka, sem sett voru 1. janúar 2007.

Fimmtíu sveitarfélög hafa fimm hundruð íbúa eða fleiri og eru því skyldug samkvæmt lögunum til að styrkja stjórnmálasamtök sem hafa einn kjörinn fulltrúa eða fleiri í sveitarstjórn, eða sem fengu fimm prósent atkvæða eða meira í kosningum.

Í ársreikningi Sjálfstæðisflokks frá 2008 kemur fram að sextán sveitarfélög styrktu flokkinn fjárhagslega það ár. Þó er ekki tilgreint hvort það var gert samkvæmt lagaskyldu eða hvort um annars konar styrki var að ræða. Framlögin voru frá 14,4 milljónum frá Reykjavíkurborg og niður í 70.510 krónur frá Blönduósi.

Á skrifstofu VG fengust þær upplýsingar að sveitarfélögin, sem hafa styrkt flokkinn samkvæmt þessum lögum, séu örfá. Skrifstofa Samfylkingar telur til átta sveitarfélög.

Halldór Halldórsson, formaður Sambands íslenskra sveitarfélaga, staðfestir að einungis hluti sveitar­félaga hafi greitt í samræmi við lögin en bendir á að umrædd lög segja ekkert um hversu mikið eigi að greiða flokkunum, einungis að flokkarnir eigi að fá greitt í samræmi við atkvæðafjölda. Lögin séu ekki nógu skýr.

„Sveitarfélögin hafa verið að velta því fyrir sér hvernig eigi að framkvæma þetta. Sum þeirra hafa talað um að greiða í lok hvers kjörtímabils og hafa því ef til vill ekki greitt enn þá. Einnig hefur verið til skoðunar að setja einhverja viðmiðunarupphæð,“ segir Halldór.

Þegar lög um fjármál stjórnmálasamtaka skylduðu sveitarfélög til að greiða með stjórnmálastarfsemi var kostnaður sveitarfélaga vegna alþingis- og forsetakosninga færður yfir til ríkisins.

Halldór segir það sjónarmið uppi hjá sveitarfélögum að miða við þá fjárhæð, þegar greitt skal til stjórnmálaflokka.

Ágúst Geir Ágústsson, skrifstofustjóri í forsætisráðuneyti, er formaður nefndar um endurskoðun þessara laga. Hann segir ljóst að sveitarfélögin fari eftir þeim á mismunandi hátt.

Nefndin er nú að vinna að tillögum að breytingum á lögunum. klemens@frettabladid.is