Gareth Barry: Það kemur enginn í staðinn fyrir Carlos Tevez

Gareth Barry, miðjumaður Manchester City, segir að fjarvera Carlos Tevez á dögunum, hafi sýnt það og sannað hversu mikilvægur Argentínumaðurinn er fyrir City-liðið. Carlos Tevez skoraði tvö mörk í sínum fyrsta leik eftir förina til Argentínu og það í 4-2 sigri á toppliði Chelsea á Brúnni.

„Við vissum hversu mikið við myndum sakna hans og stuðningsmennirnir okkar vissu það líka. Hann vinnur svo vel fyrir liðið og rífur okkur með sér með einstökum baráttuvilja. Jöfnunarmarkið hans á móti Chelsea er dæmigert fyrir hann sem leikmann. Það kemur enginn í staðinn fyrir Carlos Tevez," sagði Gareth Barry við heimasíðu Manchester City.

„Tevez hefur góða möguleika á að komast í Wayne Rooney og Didier Drogba klassa. Hann hefur skorað frábær mörk á tímabilinu og mörg þeirra nánast upp á eigin spýtur. Af hverju ætti hann ekki að vera í flokki með þeim tveimur," sagði Barry.