Tilboðum rignir á Beckham

Þó David Beckham verði ekki að sparka í bolta á heimsmeistaramótinu í sumar mun hann líklega vera á staðnum í Suður-Afríku. Tilboðum frá fjölmiðlum rignir á hann.

Sjónvarpsstöðvarnar BBC, ITV og ESPN vilja allar ráða Beckham til starfa sem sérfræðing í kringum keppnina og eru víst nánast tilbúnar til að greiða hvað sem er fyrir þjónustu kappans.

Beckham á einnig möguleika á að vera sérstakur sendiherra Englands á mótinu og þá hefur Fabio Capello einnig boðið honum að vera með enska landsliðshópnum meðan á mótinu stendur.

Talsmaður Beckham segir að hann hafi enn ekki haft tíma til að skoða öll þessi tilboð. Hann útskrifaðist af sjúkrahúsinu í Finnlandi í dag og verður í gipsi í þrjár til fjórar vikur.