Bridge aftur frá vegna meiðsla

Wayne Bridge, bakvörður Manchester City, á ekki sjö dagana sæla um þessar mundir.

Hann hefur verið að spila í gegnum meiðsli að undanförnu en þurfti að fara í aðgerð vegna kviðslits í gær.

Það þýðir að hann spilar ekki fótbolta næsta mánuð. Fyrr á tímabilinu var hann frá í tvo mánuði vegna meiðsla á hné.

Bridge náði allavega að spila gegn Chelsea á Stamford Bridge þar sem hann hafnaði handabandi við John Terry eins og frægt er. Bridge gaf ekki kost á sér í enska landsliðið eftir framhjáhaldsmálið fræga.