Nýi hluti gjörgæsludeildar opnaður formlega

Viðbygging gjörgæsludeildar á Landspítala Hringbraut verður formlega tekin í notkun á morgun klukkan þrjú. Í fréttatilkynningu frá Landspítalanum segir að gjörgæsludeildin við Hringbraut sé í „gamla spítala" sem byggður var árið 1930 og orðinn barn síns tíma. Deildin hafi verið orðin alltof lítil miðað við umfang starfseminnar og ljóst að ekki dygði að bíða eftir flutningi í nýjan Landspítala.

„Með tilkomu viðbyggingarinnar hefur gjörgæsludeildin stækkað verulega; úr 250 m2 í um 350 m2 og þykir vel hafa tekist til. Við stækkunina var legurýmum fjölgað úr 9 í 11 (að auki eitt vararými) og einnig var hægt að stækka nokkur sjúkrarýmanna. Þá var lyfjaherbergi deildarinnar, sem var einungis 2 m2 , stækkað og lager- og geymsluaðstaða fyrir dýran tækjabúnað deildarinnar bætt að mun. Aðstaða fyrir ritara var einnig bætt og deildin fékk eigin fundar- og kennsluaðstöðu. Loks er ótalið að krabbameinsdeildin fékk neðri hæð viðbyggingarinnar en hún bíður innréttingar," segir í fréttatilkynningu frá Landspítalanum.

Byrjað var að nota gjörgæsluhluta viðbyggingarinnar í miðjum svínaflensufaraldri og því hefur ekki verið hægt að taka hana formlega í notkun fyrr en nú.