Obama tilnefnir Kagan sem hæstaréttardómara

Barack Obama, forseti Bandaríkjanna, mun síðar í dag tilnefna Elenu Kagan ríkislögmann sem hæstaréttardómara. Kagan er 50 ára og staðfesti öldungadeild Bandaríkjaþings tilnefninguna verður hún yngsti dómarinn við Hæstarétt Bandaríkjanna. Hún verður jafnframt fjórða konan til að gegna embætti hæstaréttardómara.

Kagan hefur ekki starfað sem dómari áður og því er erfitt að segja fyrir um skoðanir hennar í mörgum hitamálum sem Hæstiréttur hefur þurft að mæta, svo sem lögum um fóstureyðingar.

Öldungadeildin þarf að staðfesta tilnefninguna. Þegar Kagan var skipuð ríkislögmaður í mars á síðasta ári greiddu einungis sjö repúblíkanar í deildinni atkvæði með tillögu Obama.