Orri Freyr: Skelfileg dómgæsla

"Þetta var ótrúlega sárt. Við byrjuðum leikinn ekki nógu vel en eftir fyrsta korterið fannst mér við vera sterkari út leikinn," sagði Orri Freyr eftir leikinn.

"Við vorum ekki tilbúnir í byrjun, það vantaði baráttu í okkur. Dómarinn hafði enginn tök á þessum leik og leyfði þeim að komast upp með allt allt of mikið. Þegar við fórum að mæta þeim af krafti fannst mér við hafa góð tök á leiknum."

"Allir leikmenn í okkar liði hafa lesið reglurnar og kunna reglurnar. Það var einn maður á vellinum sem kunni ekki reglurnar," sagði Orri og átti við Einar Örn Daníelsson dómara leiksins.

"Ég er skelfilega óánægður með dómarann. Þetta var til skammar. Þeir fá að komast upp með ljótar tæklingar út um allan völl og svo kemur fyrsta spjaldið fyrir mótmæli á okkar leikmann sem var alveg út í hött."

"Við vorum ekki nógu ákveðnir í að klára þetta. Það kom fullt af góðum fyrirgjöfum og öðru slíku en menn voru alltaf að bíða eftir að boltinn kæmi til þeirra í staðin fyrir að fara út og ná í boltann," sagði Orri að lokum.