Ólafur Páll: Frábær skipti fyrir mig

Ólafur Páll Snorrason gekk í raðir FH um mitt sumar frá Val og mætti í dag sínum gömlu félögum. Með 2-0 sigri FH í dag tryggði FH sér Íslandsmeistaratitilinn.

„Það er auðvitað svolítið skrýtið fyrst ég hóf tímabilið með Val en ég er vanur því að fagna titlinum hérna í Kaplakrika og þekki því þessa tilfinningu vel," sagði Ólafur en hann lék áður með FH árin 2005 og 2006 og varð Íslandsmeistari bæði árin.

„En ég er mjög ánægður með skiptin sem ég gerði í sumar. Það eina sem ég hugsaði um var að standa mig vel hér."

„Það var líka frábært að vera með þjálfara eins og Heimi Guðjónsson sem sýndi mér að hann hefur fulla trú á mér. FH er auðvitað með frábæran leikmannahóp og ég var reiðubúinn að sanna að ég ætti heima í liðinu."

„Ég kom hingað á þeim forsendum að ég þyrfti að vinna mig inn í liðið. Ég var fljótur af því og þetta reyndist vera mjög gott sumar fyrir mig."

Hann segir ekki hafa efast um að FH myndi standa uppi sem sigurvegari í lok sumars þó svo að liðið hafi misstigið sig aðeins í síðasta mánuði.

„Við gerðum okkur vissulega aðeins erfitt fyrir en við sýndum svo í dag að við erum með besta liðið á Íslandi."